Wednesday 30 April 2008

കര്‍ച്യോഫി അ റൊമാനൊ (Artichoke)


കര്‍ച്യോഫി അ റൊമാനൊ (Artichoke)

ഇതൊരു പൂവാണ്.... വിരിയാന്‍ അനുവദിച്ചാല്‍ സാമാന്യം ഭംഗിയും നല്ലവലിപ്പവുമുള്ള ഒരു പൂവ്. മൊട്ടിലെ മുറിച്ചെടുത്ത് പാചകംചെയ്താല്‍ ...ടേസ്റ്റ് പറഞ്ഞറിയിക്കാന്‍ വാക്കുകളില്ലാ.

ഒരു ശരാശരി റോമാക്കാരന്‍ ആര്‍ട്ടിചോക്ക് കഴിക്കുന്നതുകണ്ടാല്‍ ഇതിന്റെ പേര് ആര്‍ത്തിഷോക്ക് എന്ന് മാറ്റിയിട്ടാലൊ എന്നുപോലും ചിന്തിച്ചുപോകും. കുറ്റം പറയാനൊക്കില്ലാ... ഒരുപ്രാവശ്യം കഴിച്ചാല്‍ പിന്നെ എല്ലാവരുടെയും അനുഭവമിതായിരിക്കും.
അന്‍സാരികള്‍.
കര്‍ചോഫി (ആര്‍ട്ടിചോക്ക്) - 4എണ്ണം
വെളുത്തുള്ളി - 4 ഇതള്
‍ഒലിവോയില്‍ എക്സ്ട്രാവെര്‍ജിന്‍ -100 മില്ലി
പുതിനയില -
മല്ലിയില (ആ ചാഴിയുടെ മണമുള്ള ടൈപ്പല്ലാ... ഇവിടെ പ്രക്സമ്മൊളൊ എന്നുപറയും ...)
ചെരുനാരങ്ങ - 1എണ്ണം
ഉപ്പ് - ആവശ്യത്തിനു

തയ്യാറാക്കുന്ന വിധം
ഒരു പാത്രത്തില്‍ വെള്ളമെടുത്ത് അതിലേക്ക് ചെറുനാരങ്ങ പിഴിഞ്ഞൊഴിക്കുക. (ഉപ്പ് ചേര്‍ത്ത് കുടിക്കാനല്ലാ....ഈവെള്ളത്തിലേക്ക് വേണം ആര്‍ട്ടിചോക്കിനെ ക്ലീന്‍ ചെയ്ത് ഇടാന്‍. അല്ലെങ്കില്‍ ആര്‍ട്ടിചോക്ക് വല്ലാതെ നിറം മാറിപ്പോകും)
ആര്‍ട്ടിചോക്കിന്റെ പുറംഭാഗത്തുള്ള ഇതളുകള്‍ അടര്‍ത്തികളയുക... മൃദുവായ ഇതളുകള്‍ കണ്ടുതുടങ്ങുന്നതുവരെ പൊളിച്ചുകളയുക. പൂവിന്റെ ഇതളുകളുടെ മുകള്‍ഭാഗം പൊതുവെ കടുപ്പമേറിയിരിക്കും... ‍മുറിച്ചുകളയുക. ഞെട്ടില്‍നിന്നും പുറംതൊലി ശ്രദ്ധയോടെ മുറിച്ചുമാറ്റുക... നാരങ്ങാനീര്‍ചേര്‍ത്തവെള്ളത്തില്‍ മുക്കിയിടുക.
വെളുത്തുള്ളി ഇതളും പുതിനയിലയും മല്ലിയിലയും തീരെപൊടിയായ് അരിഞ്ഞെടുക്കുക - മിക്സിയിലിട്ട് ഒന്ന് അടിച്ചാലും മതി - അല്പം ഉപ്പും കുറച്ച് എണ്ണയും ചേര്‍ത്ത് നന്നായ് മിക്സ്ചെയ്യുക. ഇതില്‍നിന്നും അല്പം എടുത്ത് ആര്‍ട്ടിചോക്കിന്റെ നടുഭാഗത്ത് ഇതളുകള്‍ക്കിടയിലൂടെ വിരല്‍കൊണ്ട് കടത്തിവയ്ക്കുക.
ചുവടുകട്ടിയുള്ള ഒരു പരന്നപാത്രത്തില്‍ ഈ പൂക്കളെ തലതിരിച്ചുവയ്ക്കുക. ബാക്കിയുള്ള എണ്ണയും പുതിനമല്ലിയില മിശ്രിതവും ആവശ്യത്തിനു ഉപ്പും ചേര്‍ക്കുക. പൂക്കളുടെ ഞെട്ടോളം വെള്ളം ഒഴിക്കുക. അടുപ്പില്‍ കയറ്റി തീകത്തിക്കുക. മൂടിവച്ച് ഇരുപതുമിനിറ്റോളം വേവിക്കുക.
കര്‍ച്യോഫി അ റൊമാനോ അഥവാ ആര്‍ട്ടിചോക്ക് റോമന്‍സ്റ്റൈല്‍ റെഡി...
(ആര്‍ട്ടിചോക്കിനു പകരം വാഴക്കുടപ്പന്‍ ഉപയോഗിച്ചു ഞാന്‍ ഇതിനെ കേരളീകരിച്ചുനോക്കി... വല്യഏനക്കേടൊന്നും ഉണ്ടായില്ലാ...)

4 comments:

സുന്ദരന്‍ said...

കര്‍ച്യോഫി അ റൊമാനൊ (Artichoke)

ഇതൊരു പൂവാണ്.... വിരിയാന്‍ അനുവദിച്ചാല്‍ സാമാന്യം ഭംഗിയും നല്ലവലിപ്പവുമുള്ള ഒരു പൂവ്. മൊട്ടിലെ മുറിച്ചെടുത്ത് പാചകംചെയ്താല്‍ ...ടേസ്റ്റ് പറഞ്ഞറിയിക്കാന്‍ വാക്കുകളില്ലാ.

John honay said...

ഇതിനു തേങ്ങ ചേറ്ക്കേണ്ടതില്ലെങ്കിലും,
ഇതാ എന്റെ വക തേങ്ങയടി.
പിന്നെ,
പാചകം പരീക്ഷിച്ചു നോക്കാന്‍ സങ്ങതി നാട്ടില്‍ കിട്ടുമോ?

G.MANU said...

eda neee varumpo ithel onnu konduvarane.. ruchichu nokkiyittilla :)

ആവനാഴി said...

ഹൈ സുന്ദര്‍,

ഇതു പരീക്ഷിച്ചിട്ടു തന്നെ കാര്യം. ആങ് ഹാ!

സസ്നേഹം
ആവനാഴി